KG.TYUP.NET

Инстинкт (лат. instinctus - козгоо) - организмдин тышкы жана ички дүүлүктүрүүлөргө карата өзгөрбөс тубаса татаал реакциясы же жүрүм-турум белгилери. Ал жаныбарлардын белгилүү түрүнө орток мүнөздүү болуп, өзгөчө курт-кумурска, балык, куштарда жакшы өөрчүгөн. Инстинкт организмдердин тарыхый өөрчүү процессинде иштелип чыгып, жашоо шартына ылайыкталуунун бир формасына айланган. Биологиялык мааниси боюнча инстинкт бир нече топко бөлүнөт; тамактануу инстинкти, коргонуу (өзүн коргоо) инстинкти, жыныстык инстинкт, ата-энелик инстинкт жана башка.